وزیرِ اعلیٰ پنجاب مریم نواز نے کہا ہے کہ پاکستان کے کھلاڑی دنیا بھر کے میدانوں میں بہترین کارکردگی کا مظاہرہ کر رہے ہیں، ایتھلیٹ مونا خان نے ثابت کیا کہ خواتین کھلاڑی کسی سے کم نہیں۔

وزیرِ اعلیٰ پنجاب سے ایتھلیٹ، جرنلسٹ مونا خان اور کوچ محمد یوسف نے ملاقات کی۔

مریم نواز نے ایتھلیٹ مونا خان اور کوچ محمد یوسف سے ملاقات کے دوران گفتگو کرتے ہوئے کہا کہ حکومت پنجاب کا اولین مقصد نوجوانوں کو کھیلوں کے میدانوں کی طرف لے کر آنا ہے۔

انہوں نے کہا کہ ’کھیلتا پنجاب‘ پروگرام کے تحت کھیلوں کے فروغ اور خواتین کھلاڑیوں کو آگے بڑھنے کے مساوی مواقع فراہم کیے جارہے ہیں۔

مریم نواز کا کہنا تھا کہ صوبے میں منعقدہ پہلی پنک گیمز میں 1300 خواتین پلیئرز نے حصہ لے کر ریکارڈ قائم کیا، پنک گیمز کی انعامی رقم 50 لاکھ سے بڑھا کر ایک کروڑ روپے کردی گئی ہے۔

اس موقع پر وزیرِ اعلیٰ پنجاب نے مونا خان اور کوچ محمد یوسف کو 5، 5 لاکھ کے چیک دیے جبکہ مونا خان نے مریم نواز کو اجرک پہنائی اور پنسل اسکیچ پیش کیا۔

ایتھلیٹ مونا خان اور کوچ محمد یوسف نے وزیراعلیٰ مریم نواز کو گولڈ میڈل پیش کیا۔

مونا خان نے کہا کہ اپنا میڈل وزیرِاعلیٰ مریم نواز سے منسوب کرتی ہوں، پنجاب کے عوام سے ہمیشہ مریم نواز کے بارے میں تعریف سنی، عالمی سطح پر جب بھی اعزاز حاصل کروں گی تو پاکستان اور مریم نواز کا نام بھی آئے گا۔

واضح رہے کہ ایتھلیٹ مونا خان کو لندن میں 42.2 کلو میٹر طویل میراتھن 2025ء کو مکمل کرنے کا اعزاز حاصل ہے۔