امریکا میں ایک بھارتی طالب علم اپنی سالگرہ کے موقع پر حادثاتی طور پر گولی لگنے سے ہلاک ہوگیا۔
بھارتی میڈیا کی رپورٹ کے مطابق امریکا کے شہر اٹلانٹا، جارجیا میں ایک 23 سالہ طالبعلم آریان ریڈی اپنی سالگرہ کے موقع پر گولی چلنے سے ہلاک ہوگیا، وہ 13 نومبر کو اپنے دوستوں کے ساتھ گھر میں سالگرہ منا رہا تھا۔
رپورٹ کے مطابق سالگرہ منانے کے دوران وہ اپنی شکار کی گن لیکر آیا اور اس کی صفائی کرنے لگا، اس دوران غلطی سے گولی چل گئی جو سیدھی اس کے سینے میں جا کر لگی۔
اس دوران اس کے دوست گھر کے دوسرے کمرے میں موجود تھے، جو فائر کی آواز سن کر آریان کی طرف دوڑے تو اسے خون میں لت پت پایا، جسے فوری طور پر قریبی اسپتال منتقل کیا گیا، مگر وہ اس سے پہلے ہی دم توڑ چکا تھا۔
آریان ریڈی کینساس یونیورسٹی میں ماسٹر آف سائنس کا سیکنڈ ایئر کا طالب علم تھا اور بھارت کے علاقے تلنگانا سے تعلق رکھتا تھا، آریان ریڈی کی لاش آج رات ان کے آبائی شہر منتقل کی جائے گی تاکہ آخری رسومات ادا کی جا سکیں۔
